Манайд вакуум цонхны жижиг үйлдвэр хэт олширсноос сонголт хийхэд хэцүү болсон. Иргэд хувиараа вакуум цонх их хийж байгаа нь нэг талаар үйлдвэрлэл эрхлэгчийн өрхийн амьжиргаанд нэмэртэй ч эцсийн дүндээ хэрэглэгчийн эрх ашигт нөлөөлж, чанаргүй бүтээгдэхүүн гарах нь ихэсч байна.

Уг нь вакуум цонх нь өнгө үзэмж сайн, дулаан бага алддаг, эдийн засгийн хэмнэлттэй бүтээгдэхүүн юм. Энэ байдлаараа манай зах зээлд эрэлт өндөртэй хэдий ч чанарын хувьд харилцан адилгүй байгаа тул зөв сонголт хийхэд тань туслах үүднээс доорх зөвлөгөөг толилуулж байна.

Хамгийн гол нь эдгээр зүйлсийг хийхэд танд мэргэжлийн хүний оролцоо, шаардлага огтхон ч хэрэггүй. Цонхоо дулаалдагтай л адил.

Хэрэглэгч яаж оновчтой зөв сонголтыг хийх вэ?

Юуны өмнө та сонгож буй цонхоо хаанахын ямар үйлдвэрийнх болох, технологийн зөв горимын дагуу хийгдсэн эсэхэд анхаарлаа хандуулаарай.

1.      Энэ үйлдвэрийн бүтээгдэхүүнийг өмнө нь авч хэрэглэсэн ямар газрууд байгааг судлаж үз. Материалын чанарыг шалгахдаа дараах зүйлийг анхаараарай. Вакуум цонхны хуванцар материал нь муу бол хэрэглээний явцад гадна темратурын нөлөөгөөр өнгө нь шарладаг. Мөн химийн бодисын найрлага хэтэрснээс материал нь үнэртэй байдаг бөгөөд энэ нь хүний эрүүл мэндэд сөргөөр нөлөөлдөг.

2.      Цоож, нугасны хувьд зузаан төмөртэйг нь сонгох хэрэгтэй. Цонхны шил нь нөлөөтэй эсэхийг анхаараарай.

3.      Хэлбэр хийцийн хувьд энгийн онгойдог, чагт хэлбэрийн рамтай бол нумрахгүй. Голоор нь хийсэн төмөр нь сайн байх хэрэгтэй. Цонхны шилийг дарагч резин нь татахад тасрахгүй, элдэв үнэргүй бол сайн.

Хамгийн гол анхаарах зүйл нь цонхыг суурилуулах асуудал. Манайхан өрлөг хийхдээ цонхныхоо хэмжээгээр зай үлдээдэг нь буруу. Цонх суух хэсгийн гадна талын хана нь цонхны хүрээний 1|3тэй тэнцэхүйц хэмжээгээр догол буюу хөмсөгтэй байвал амлагаа хийхэд тохиромжтой, хүйтэнд цантдаггүй.

Вакуум цонх цантана гэдэг нь хийтэй байна гэсэн үг. Дотроо будаатай байвал цанталтаас хамгаалдаг. Мөн гэрийн дулаан цонхны зай завсар, цонхны шилээр алдагдддаг.

Иргэд гэрийнхээ цонхны дулаан алдагдлыг бууруулахын тулд дараах арга хэмжээнүүдийг урьдчилан авсан байхад өвөлдөө дулаан, тав тухтай амьдрах боломж бүрдэх юм.

·         Цонх, хаалганы завсар зайг сайтар чигжиж битүүмжлэх, ингэснээр алдагдлыг наад зах нь 5-15% бууруулах боломжтой; (цонхны замаскийг силиконоор солих, уян жийргэвч, пролонон тууз наах, цонхны хүрээ болон ханын хоорондох заадсыг полиуретан хөөс, эрдэс хөвөнгөөр дүүргэх г.м.)

·         Цонх болон орцны хаалганы гадна талд салхины хаалт, хөшиг хийх, эсвэл гонх буюу тамбур барих

·         Давхар хавтастай модон цонхны нээлхий буюу салхивчны хэсгийг бусад хэсгээс бүрэн тусгаарлагдсан байхаар өөрчлөн сайжруулах. Ингэснээр цанталт үүсэхээс зайлсхийнэ

·         Одоо байгаа цонхны дотор талд нэмэлт цонх суулгах

·         Одоо байгаа 2 давхар шиллэгээтэй цонхонд нэмэлт шиллэгээ хийх буюу 3 дахь давхар нэмэхээс гадна хоёр давхар шиллэгээтэй цонхны чигжээсийг ялангуяа дотор талаас нь муу хийвэл түүгээр тасалгааны чийгтэй агаар нэвтэрч гадна талын шилийг цантуулан, улмаар цонхны модон хийцийг норгох аюултай. Чийг авсан мод тэлж, хэв гажилтанд орсноор цонх нээгдэж хаагдах нь хүндрэлтэй болохоос гадна, зай завсартай гардагийг анхаараарай. Цонхны гадна талд мөн ус зайлуулах хаялга төмөр заавал хийгээрэй.

Хэрэв хуучин цонхыг сайжруулах нь төвөгтэй бөгөөд ихээхэн зардал гарахаар бол цонхоо шинэчлэх хэрэгтэй. Иймээс засах уу, эсвэл шинээр солих уу гэдгийг эхлээд тооцож үз.

Дээрх зөвлөгөөг дагаад үзвэл шилээр алдах цонхны дулаан алдагдлыг тодорхой хэмжээгээр бууруулах боломжтой.