Буурал анд маань тэнгэрийн оронд барилгын материалаа үйлдвэрлэж, яруу найргаа туурвихаар одлоо.

ЧАНРАВ ОВОГТОЙ БААТАРСҮРЭН

(1944-2016)

Монгол улсын зөвлөх инженер Чанрав овогтой Баатарсүрэн нь 2016 оны 9 дүгээр сар 29-ний өдөр зуурдаар таалал төгслөө.

        Чанрав овогтой Баатарсүрэн 1944 онд Говь- Алтай аймгийн Чандмань суманд төрсөн.   МУИС, Польш улсын Варшав хотын Политехникийн дээд сургуульд суралцаж, Барилгын материалын үйлдвэрийн Инженер-технологич мэргэжил эзэмшсэн.

            Ч.Баатарсүрэн 1970-1972 онуудад Барилгын материалын үйлдвэрлэл эрдэм шинжилгээний институтэд     Эрдэм шинжилгээний ажилтан, 1972-1986 онд    ББМҮЯ-ны барилгын материалын үйлдвэрийн хэлтэст мэргэжилтэн, ахлах мэргэжилтэн, 1986-1993 онд Улаанбаатар Ханын материалын комбинатад ерөнхий инженер, үйлдвэр эрхэлсэн тэргүүн дэд захирал, 1993-2007онд БХБЯаманд ахлах түшмэл, 2007-2010 онд Нийслэл өргөө ХХК-д Захиргаа, удирдлагын газрын дарга, 2003 оноос Монголын барилгын материал үйлдвэрлэгчдийн холбоонд бодлогын зөвлөх, 2010 оноос одоог хүртэл Барилга.МН сэтгүүлийн эрхлэгчээр тус тус  ажиллаж байлаа.

Ч.Баатарсүрэн нь нийгмийн шинэ тогтолцоонд шилжиж бараг зогсолтын байдалд орсон үйлдвэрүүдийн үйл ажиллагааг сэргээх бодлого боловсруулах хууль эрх зүйн орчинг бүрдүүлэх, импортын олон нэр төрлийн бүтээгдэхүүнийг дотооддоо үйлдвэрлэх, шинэ техник технологи нэвтрүүлж эзэмших энэ ажилд үндэсний бизнес эрхлэгчдийг татахад үлэмж санаачлагатай үр бүтээлтэй ажилласан билээ.

Тухайлбал: Монгол улсын барилгын материалын үйлдвэрийг (1995-2010 онд) сэргээж хөгжүүлэх, бүтээгдэхүүний стандартчилалын ажлыг 1995-2000 онд явуулах хөтөлбөрийг боловсруулж, батлуулахад идэвхи санаачлага гарган ажилласан төрийн түшээ байлаа.

Ч.Баатарсүрэн нь Монголын барилгын материал үйлдвэрлэгчдийн холбооны зөвлөхөөр үүсгэн байгуулагдсан үеэс нь эхлэн ажиллаж байгаа бөгөөд төрийн бус мэргэжлийн энэ байгууллагыг бэхжүүлэх, төр болоод хувийн хэвшлийн ажлын уялдаа, хамтын ажиллагааг үр бүтээлтэй болгоход зохих үүрэг гүйцэтгэн ажиллаж байлаа.

Ч.Баатарсүрэн нь Монгол улсын барилгын салбарыг хөгжүүлэн бэхжүүлэх үйл хэрэгт нийгмийн аль ч тогтолцооны үед 47 жилийн турш тасралтгүй ажиллахдаа өөрийн мэргэжлийн ур чадвар, дадлага туршлагаа дайчлан ажилладаг салбарын ахмад шилдэг инженерийн нэгэн билээ.

Ч.Баатарсүрэн нь Техникийн ухааны магистр, Монгол улсын зөвлөх инженер, докторант байсан бөгөөд мэргэжлийн чиглэлээр хэд хэдэн ном, товхимол гаргасны зэрэгцээ шинжилгээ судалгааны материалууд, олон арван өгүүлэл, яруу найргийн түүвэр бичин хэвлүүлж, мөн хэд хэдэн номын хамтран зохиогч, хянан тохиолдуулагчаар ажилласан, сэтгүүлзүй, утга зохиолын салбарт ч дуурсагдах гавьяатай нэгэн билээ.

            Мөн тэрээр “Барилга.МН” сэтгүүлийн эрхлэгчээр зургаа дахь жилдээ буюу хоёр дахь дугаараас нь эхлэн ажилласан бөгөөд манай сэтгүүл энэ хугацаанд үр дүнтэй ажиллаж, салбартаа нэр хүндтэй, олон зуун захиалагч, уншигчидтай, сар тутмын тогтмол хэвлэл болсонд түүний оруулсан хувь нэмэр үнэлж баршгүй их юм.

Ч.Баатарсүрэн нь Ардын хувьсгалын 60, 70, 80 жилийн ойн медалиуд, Их Монгол Улс байгуулагдсаны 800 жилийн ойн хүндэт медаль, Хөдөлмөрийн хүндэт медаль, Алтан гадас одон, Хөдөлмөрийн гавъяаны улаан тугийн одонгоор тус тус шагнагдаж байсан.

            Ч.Баатарсүрэн таны гэгээн дүр, ажил үйлс, бүтээл туурвил, ажилч хичээнгүй, хүнлэг шударга зан чанар, халуун сэтгэл тань бидний сэтгэл зүрхэнд үүрд хадгалагдан үлдэх болно.

Түүний гэр бүл, үр хүүхдүүд, төрөл төрөгсөд, ах, дүүс, найз нөхдөд нь гүн эмгэнэл илэрхийлье. Ум сайн амгалан болтугай.

БАРИЛГА, ХОТ БАЙГУУЛАЛТЫН ЯАМ

БАРИЛГА.МН СЭТГҮҮЛ

МОНГОЛЫН БАРИЛГЫН МАТЕРИАЛ ҮЙЛДВЭРЛЭГЧДИЙН ХОЛБОО

МОНГОЛЫН БАРИЛГАЧДЫН НЭГДСЭН ХОЛБОО